Пĕлтĕрхи кăтартусем тăрăх, республика бюджечĕ пĕрремĕш хут 100 млрд тенкĕрен иртнĕ. Ун тупăш пайĕ 107,1 млрд тенкĕпе танлашнă, тăкаксен калăпăшĕ - 102,6 млрд тенкĕпе. Ку цифрăсене республикăн финанс министрĕ Михаил Ноздряков Министрсен Кабинечĕн ларăвĕнче пĕлтернĕ.

Уйрăммăн палăртмалла, 2023 çулхипе танлаштарсан пĕлтĕр бюджетăн тупăш виçи 13 млрд тенкĕ чухлĕ ÿснĕ, е 13,8 процент. Харпăр хăй тупăш калăпăшĕ 67 млрд тенке çитнĕ, 11,9 млрд тенкĕ чухлĕ пысăкланнă. Çав шутра налуксем республика «енчĕкне» 19,3 процент ытларах ?60,4 млрд тенкĕ% хушăннине каламалла. Республика бюджетне пырса кĕнĕ инвестици хывăмĕсем те 2,8 процент нумайрах - 12,7 млрд тенкĕ.

Республикăн пĕлтĕрхи бюджечĕн тĕп уйрăмлăхĕсем:

- социаллă ыйтусене татса парассине ытларах тимлĕх уйăрнă*

- экономика отраслĕсене пулăшу парасси ÿснине кура промышленноçăн тата ял хуçалăхĕн хăшпĕр кăтартăвĕсемпе Чăваш ен Атăлçи федераци округĕнче тата Раççейре лидерсен йышне кĕнĕ*

- вырăнти бюджетсене çирĕплетессине малалла тăснă.

Каласа хăвармалла, 2024 çулта 9 шкулăн, 3 ача-пăча сачĕн, 9 спорт объекчĕн, пурăнмалли çурт-йĕрпе коммуналлă инфраструктурăн 45 позицийĕн строительствине пурнăçланă, çурт-йĕр сечĕ аталаннă, социаллă сферăри вуншар объекта проектланă.

Ирина ПЕТРОВА