Чăваш енре июлĕн 18-19-мĕшĕсенче ăратлă выльăхсен Пĕтĕм Раççейри иккĕмĕш аукционĕ иртет. «Чебомилк» агропарк çĕршывран килнĕ хăнасене кĕтсе илĕ.

Чăваш Республикин ертÿçи Олег Николаев çирĕплетнĕ тăрăх, аукцион йĕркелени хамăр çĕршыври выльăх-чĕрлĕх отрасльне аталантарас ĕçре кирлĕ утăм тума пулăшать, чи лайăх практикăсемпе паллашма май парать, конкурентлăха ÿстерет.

Мероприяти программи анлă пулмалла. Ăратлă выльăх-чĕрлĕхе презентацилесси тата сутасси, селекци ĕçĕ-хĕлĕнчи çитĕнÿсене тишкересси, сĕт производствинчи çĕнĕлĕхсемпе паллаштарасси, экстерьер хаклавĕ, специалистсен сĕнÿ- канашĕ тата ытти те пулĕ аукционра. Онлайн-трансляци пĕтĕм Раççейĕпех тата СНГ çĕршывĕсенче иртĕ.

Июлĕн 19-мĕшĕнче «Сĕт вăхăчĕ» фестиваль пулать. Хăнасене асра юлмалли уяв кĕтет. Çамрăк талантсем хăйсен вăйне «Супер-ĕне» ÿкерчĕксен конкурсĕнче тĕрĕслеме пултарĕç. Фестивале килнисене «Земляне» легендарлă ушкăн концерт кăтартса савăнтарĕ.

Елена Толстова