Çак çул çумăр çăвĕпех çумарĕ. Çĕрсем çуркаланчĕç, çарансем çитĕнеймерĕç. Çуртрисем çийĕнчи çумкурăксем çеç çăп-çăра, çынран çÿллĕ çитĕнчĕç.

Çухрăм çурăри çеремлĕ çырмара Çерушпа Çтаппан çĕр çырли çисе çÿреççĕ. Çтаппан çÿхе çуткам çÿçлĕ. Çеруш - çăра çырă çÿçлĕ.

Çтаппан Çерушран çÿллĕрех. Çтаппан çичĕ çул çурăра, Çеруш çиччĕре. Çтаппан Çĕнĕ çулта çуралнă, Çеруш - çав çулах çулла.

Çтаппан çыпăçуллă çăтă-çăтă çитмапа. Çеруш, çăмăлттайланса, çĕнĕрен-çĕнĕ çитмапа çÿрет. Çак çÿхе çитсăран çĕленĕ çитмине çуркуннех çатан çинчи çапăран çаклатса çĕввинчен çурнăччĕ, çаплипех, çĕтĕккине çĕлеттермесĕр çÿрет.

Çырмана çырлана çÿрекенсем çитеймен-ха, çырлисем çупкăм-çупкăм. Çиеймичченех çырла çинĕскерсем çав-çавах Çерушпа Çтаппан çавăнтах çаврăнкаласа çÿреççĕ.

Çĕр çинчи çÿпĕ-çапăсене çавăрттарса çавра çил çитрĕ. Çав çеккунтрах çÿлтен çĕре çити çап-çутă çутатса çиçĕм çиçрĕ. Çан-çурăмĕ çÿçеннипе Çеруш çинçен çухрашкаласа, çивĕчскер, çулсăрах çиçтерчĕ. Çил-тăвăллă çумăртан Çерушпа Çтаппан Çерушсен çенĕкне çитсе çăлăнчĕç.

Çерçисем çуйхашрĕç, çăхансем Çавал çыранĕнчи çирĕклĕхре çухалчĕç. Çерушпа Çтаппан çитнĕ-çитменех çĕнĕ çупа çемçе çăкăр çирĕç. Çерушсен çулталăка çитекен Çимунне çырла çитерчĕç.

Çил çенĕк çумĕнчи çамрăк çĕмĕрте çиллессĕн çулăхса çемçе çулçисене çатăлтаттарчĕ. Çăл çывăхĕнчи çĕр çулхи çÿллĕ çăкана çăтăр-çатăр çавăрса çапрĕ. Çăкана çавăрса çаннипе çеç çырлахмасăр çуртсен çивиттийĕсене çĕмĕрсе çÿрерĕ. Çтаппан Çерушсен çенĕкĕнчех çывăрма çураçрĕ, Çеруш çурăмĕ çумĕнче. Çурçĕрпеле çумăр çĕнĕрен çаврăнса çитсе çутăличченех çурĕ, çиçĕмĕ çине-çинех çиçрĕ.

Çакă çиллĕ çумăр çĕре çителĕклех çимĕçтерчĕ.

Галина ИЛЬИНА