Çĕршыв хÿтĕлевçисен ячĕсене ĕмĕрлĕх упраса хăварас тени чăннипех те сăваплă ĕç. Çавалкас Хирпуç ялĕнче пурăнакансем те халĕ ку енĕпе мăнаçланма пултараççĕ - кунта Тăван çĕршывăн Аслă вăрçин паттăрĕсемпе тыл ĕçченĕсене халалласа палăк лартнă.

Ырă ĕçе пуçараканĕ - Зоя Павловна Игнатьева. Вăл ку ялтан, Канашри 18-мĕш ача сачĕн заведующийĕнче тимлет.

Ун шухăшне ентешĕсем те ырланă. Укçа-тенке те ял çыннисем хăвăртах пуçтарнă, палăкне те ял хастарĕсем хăйсемех çĕклесе лартнă. Çĕнтерĕве çывхартас тесе тăрăшнă кашни çыннăн ятне кĕртнĕ çавалкас-хирпуçсем, хушаматсене палăкăн ум енне çирĕплетнĕ.

- Пирĕн ялти Павел Алексеевич Алексеев, ак, Хĕрлĕ Çăлтăр орденне тивĕçнĕ. Çакна эпир «Çĕнтерÿ çулĕн» пĕр номерĕнче вуласа пĕлтĕмĕр. Вăл вăрçа хутшăннине пĕлнĕ-ха, анчах ун çакăн пек сумлă награда пулнине ăнкарман, - терĕ ку ялти Валентина Федоровна Алексеева. Вăл ентешĕсене ĕмĕрлĕх ĕçшĕн тав турĕ.

Палăка уçма нумаййăн пуçтарăннă. Çакă вĕсенче патриотлăх туйăмĕ пысăк пулнине çирĕплетет.

Светлана ЧИКМЯКОВА