«Раççей ăмăрткайăкĕсем» организацин хастарĕсем - Пăртас шкулĕн 2-3-мĕш класĕсенче вĕренекенсем тата вĕсен ашшĕ-амăшĕ «Хамăрăннисене пăрахмастпăр» акцие хутшăннă. СВО участникĕсем валли гуманитари пулăшăвĕ пухнă.

Посылкăсем апат-çимĕçпе, гигиена хатĕрĕсемпе тата ытти кирлĕ япаласемпе тулнă. Гуманитари пулăшăвне пухас ĕçе йĕркелессипе шкул ертÿлĕхĕ, Валерия Григорьевна Егорова, Светлана Николаевна Лукина педагогсем тăрăшнă. Хастар вĕрентекенсем тата ыркăмăллăх акцине чун-чĕре ыйтнипе хутшăнакансем, гражданла яваплăха туякансем пурте тав сăмахĕсене тивĕçлĕ.

Калас пулать, кашни вĕрентÿ учрежденийĕнчех СВО-ри салтаксене пулăшу кÿрес, Çĕнтерĕве çывхартма тÿпе хывас тесе тăрăшаççĕ. Ыркăмăллăх акцийĕсене хутшăнни çамрăк ăрура патриотизм туйăмĕсене çирĕплетет. Пурте - ачасем те, çитĕннисем те - пĕр пулсан çĕнеймĕ пире тăшман.

Чылайăшĕн тăванĕ-пĕлĕшĕсем е теприсен çывăх юлташĕсем ятарлă çар операцийĕнче. Хăюллă салтаксемпе офицерсем мирлĕ кунсем çитчĕр тесе хăйсен сывлăхне-пурнăçне шеллемеççĕ.

Паттăрсенчен тăшман пульли аякран иртсе кайтăрччĕ. Çар тивĕçне чыслăн пурнăçлакансен салтак çулĕ каялла вырттăр. Вĕсен чĕрĕ-сывă таврăнмалла, çемйипе нумай çул савăнса пурăнмалла, ачисемпе мăнукĕсене çитĕнтермелле пултăрччĕ.

Елена ТОЛСТОВА