Чăваш енре «Патриотизмăн 10 енĕ» республика форумĕнче «Воин» центр инструкторĕсем çамрăксемпе тĕл пулнă.

Тĕлпулăва шкул ачисем, çарпа патриотизм клубĕсенчи çамрăксем тата вĕрентекенсем килнĕ.

Мероприятире инструкторсен опычĕпе паллаштарнă, ачасен ыйтăвĕсене хуравланă. Харпăр хăй çулне суйласси, хÿтĕлевçĕ профессийĕ, Тăван çĕршыв мăнаçлăхĕ, нацисен пĕрлĕхĕ тата ытти пĕлтерĕшлĕ темăсем тавра калаçусем пынă.

Форумăн паллă саманчĕ - Чăваш ен Пуçлăхĕ Олег Николаев «ВОИН» центрăн экспозицийĕпе паллашни. Олег Алексеевич филиал ĕçне пысăка хурса хакланă, курсантсен командине çитес çул Пĕтĕм Раççейри «Çар çыннин çулĕ» çарпа тактика ăмăртăвĕнче çĕнтерме суннă.

Елена ТОЛСТОВА