Октябрь уйăхĕн 3-мĕшĕнче Чăваш Республикинче ятарлă çар операцийĕн участникĕсене е вĕсен çемье членĕсене çĕр участокĕсем вырăнне 250 пин тенкĕлĕх сертификат памалли çинчен саккуна йышăннăччĕ.

Правительствăн председателĕ Сергей Артамонов укçа-тенкĕпе тивĕçтермелли йĕркене çирĕплетекен постановление алă пуснă. Тĕп услови - çĕр участокне илме учетра тăмалла тата республикăра регистраци пулмалла. Тÿлев - тĕллевлĕ. Укçа-тенкĕпе пурăнмалли çурт-йĕр туянма е хăпартма, çĕр участокĕ илме тата ипотека тÿлеме юрать. Чарусем те пур. Çывăх тăвансенчен тата пурăнма юрăхсăр çурт-йĕре туянма юрамасть.

250 пин тенкĕлĕх сертификата илме заявление вырăнти администрацине тăратмалла. Майлă хурава илнĕ хыççăн 6 уйăхра тивĕçтерекен çурт-йĕр тупмалла тата кирлĕ документсене пуçтармалла. Вĕсене Социаллă пулăшу мерисене кÿрекен центра çитерсе памалла. Укçа-тенке тÿреммĕнех застройщике, сутуçăна е банка куçарса параççĕ.

2026 çул валли ятарлă çар операцине хутшăнакансене 250 пин тенкĕпе тивĕçтерме республика бюджетĕнче 60,8 миллион тенкĕ пăхса хунă.