Çанталăк, тĕлĕнеп кăçал,

Уççи-хуппи çук пĕлĕтре.

Ĕнер те юр, паян та вăл

Иртен ирех юхать çÿлтен.

Атте кил-çурчĕ шап-шурах

Пÿрт çийĕ таранах.

Çаплаччĕ ман ачалăхра,

Юр тарăнччĕ чăнах.

Сыраттăмăр йĕлтĕр тавра

Кантра - вара çырми-çатри

Хыçа юлатчĕ, шеп ума

Тухса тăратчĕ шкул карти.

«Лыжня» çинче вуншар ача

Чупаççĕ ăмăртса.

Сăмса шывне шăлма вара

Май çук - туя алра.

Ачалăхпа шкул çулĕсем

Тухаççĕ куç умне.

Унта туссем, хĕр-юлташсем,

Яшсем-комсомолсем.

Стенгазетсем те конкурссем,

Турнирĕ, вăйăсем.

Таш ташлани, юрланисем,

Тимур командисем.

Кĕтеттĕмĕр Çĕнĕ çула,

Юр Пикепе Хĕл Мучине.

Сип-симĕс чăрăш уявра

Чĕнетчĕ хăй патне.

Парне илме хут хутаçне

Майлаттăмăр кашни.

Мучи умне тăрса пĕрле

Юрлаттăмăр чунпа...

Ăçта халь эс, ачалăхăм/

Ăçта эсир, туссем/

Хăрах куçпа хăть пăхăттăм -

Хыçра çав вăл çулсем...

Тĕлейлĕ пултăрччĕ ку çул.

Вут-çулăмлă Лаша,

Илсе килсем вăрăм кун-çул

Кашнин валли кăçал.