Ача-пăча та мушенниксен ултавне хăвăрт лекме пултарать. Вĕсене суйма, илĕртме е тата хăратма та питĕ ансат. Çакăнпа усă кураççĕ те шулĕксем. Ачасене улталаса ашшĕ-амăшĕ ячĕпе кредитсем илтерни те тем чухлех. Çитменнине, преступниксем вĕсене тем тĕрлĕ киревсĕр ĕç тутарма пултараççĕ.

Акă, республикăри Шалти ĕçсен министерстви нумаях пулмасть Шупашкарта 15-ри хĕрачан çемйи хытах шар курнине пĕлтерчĕ. Ун патне мобильлĕ çыхăну компанийĕн сотрудникĕ текен арçын шăнкăравланă-мĕн. «Сим-карта срокĕ вĕçленнĕ, ун ĕçне тăсма СМС-па килнĕ код кирлĕ», - тенĕ. Хĕрача ăна-кăна шутламан, мĕн ыйтнине тÿрех каланă. Çавăн хыççăн палламан çынпа калаçу вĕçленнĕ.

Анчах çакăнтан пĕтĕмпех пуçланнă кăна иккен. Кĕçех шкул ачипе «çар прокуратуринчен» çыхăннă: ун ячĕпе такам счет уçнă, ВСУ-на пулăшма укçа ярать тесе суйнă. «Террорла ĕçшĕн» тата «патшалăха сутнăшăн» суд тенкелĕ çине лартассипе те хăратнă.

Тĕплĕнрех - хаçатра.

Ирина ЯКОВЛЕВА