Медицина технологийĕсем хăвăрттăн аталанса пынă май чир-чĕре тупса палăртма ансатрах. Ытларах чухне ракран сипленме пулать.

2025 çулта Чăваш енре усал шыçăсем 5407 тĕслĕх çырăннă. Пĕрремĕш вырăнта - ÿт-тир ракĕ, ÿпке, сĕт парĕсен тата апат-çимĕç органĕсен шыççисем. 60 процентне малтанхи тапхăрта тупса палăртнă. Кăрлач уйăхĕн 1-мĕшĕ тĕлне диспансер учетĕнче онкологипе чирлĕ 35 пин çын тăни паллă. «Рак» - приговор мар. Пациентсенчен 68 проценчĕ диагноз лартнă хыççăн 5-мĕш çул е тата ытларах пурăнать.

Чире вăхăтра тупса палăртнин пĕлтерĕшĕ пысăк. Профилактика тĕрĕслевĕсем, диспансеризаци витĕр тухни, харпăр хăй сывлăхне кулленех тимлĕх уйăрни пурнăçа çăлма, кун-çула вăрăмлатма пулăшать.

Сергей АЛЕКСЕЕВ, Сывлăх сыхлавĕн

министерствин штатра тăман специалисчĕ