Чăваш Республикинче «Земство культура ĕçченĕ» программăна хутшăнма кăмăл тăвакансенчен заявкăсем йышăнма пуçланă. Конкурс июль уйăхĕн 15-мĕшĕччен тăсăлĕ. Программăна культура енĕпе аслă е вăтам пĕлÿ илнĕ специалист хутшăнма пултарать.

Унăн яллă тăрăхри е 50 пин çын сахалрах пурăнакан поселоксемпе хуласенчи культура учрежденийĕнче 5 çултан кая мар ĕçлемелле. Асăннă программăпа яла ĕçлеме каякансене 1 млн тенкĕ парĕç. Укçа-тенкĕпе усă курмалли чарусем çук.

Чи пысăк балл пухнă 20 специалист республикăри культура çурчĕсене, искусство, музыка, ÿнер шкулĕсене ĕçе вырнаçма пултарĕ. Заявкăсене çак адреспа йышăнаççĕ: Шупашкар хули, Энтузиастсен урамĕ, 26-мĕш çурт, 113-мĕш пÿлĕм.

2025 çулта «Земство культура ĕçченĕ» программăпа 7 специалист яллă тăрăхсенче тимлеме пуçланă. Вĕсенчен пĕри - Вăрнар округĕнче. Евгений Кудрявцев Хапăсри культура çурчĕн заведующийĕн тивĕçĕсене пурнăçлать.