Ирхине

Ача чухне ирпе анне

Ачашшăн, лăпкăн вăрататчĕ.

Пуçтах автан та картишне

Пĕр вĕçĕм уççăн янрататчĕ.

Сĕтел çинче кĕтет яшка,

Унтах ав чейĕ пăсланать-çке.

Çитен шкула хашка-хашка,

Кĕçех урок та пуçланать-çке.

Ĕнер кăна пĕлÿ çулне

Такăрлатма эп пуçласаччĕ.

Кунсен, çулсен çураçăвне

Йăлт ăнланма шухăшласаччĕ.

Кам пăхăнтарнă вăхăта/

Вăл хăй пурне те пăхăнтарнă.

Ачалăх тарнă саманта

Кам халиччен тытса чарайнă/

Текех эп пĕчĕк ача мар,

Анне сасси мана вăратмĕ.

Автан та – халапри сăнар,

Шел, ÿлĕмрен салам ăсатмĕ.

Эп пурпĕр тăрăп савăнса,

Ирпе аттеçĕм шăнкăравлĕ.

«Юлман-ши хĕрĕм çывăрса. –

Пĕлесшĕн. – Оля мĕн хуравлĕ/»

Васкатăп эп ыйха сирме.

Атте хаваслă, çĕкленÿллĕ.

Хĕвел кĕрет ман пÿлĕме

Яланхи пек, вăр-вар, хĕрÿллĕ.