Эсир 9-тан пуçласа 17 çулта... Интереслĕ текстсем çыратăр... Пурне те илĕртекен видеосем ÿкеретĕр е социаллă сетьсене контентсемпе тухатăр.

Е тата кăçалхи чи çамрăк автор ячĕшĕн тупăшма хатĕр-и/ Апла пулсан сире «МедиаВзлет» çĕнĕ фестиваль хапăлласах кĕтет.

Палăртнă тăрăх, вăл пĕтĕм Раççейри талантлă контент-мейкерсене пĕрлештермелле. Ачасемпе çамрăксен унта пĕрремĕш хут хăйсен медиапроекчĕсемпе палăрма май пулĕ. Масштаблă мероприяти Чăваш енре апрельте анлăн сарăлĕ, унччен вара конкурс суйлавĕ витĕр тухмалла.

Видеопроект, аудиопроект, социаллă сетьри медиапроект, шкулти медиацентр, пичет публикацийĕ, пичет изданийĕ, лонгрид - чи лайăххисене медиаэкспертсем темиçе номинацире пĕлтерĕç.

Регионсем хушшинчи ку пысăк мероприятие йĕркелеме пирĕн ĕçтеш те хăйĕн тÿпине хывни уйрăмах кăмăллă. Фестиваль ячĕн авторĕ - «Çĕнтерÿ çулĕ» район хаçачĕн тĕп редакторĕ Светлана Чикмякова. Чăваш ен Цифра аталанăвĕн министерстви çĕнĕ проектăн ятне тупма пурне те соцсетьре хăйсен шухăшне пĕлтерме ыйтсан вăл шăпах та «МедиаВзлет» варианта сĕннĕ. Ку ята сасăлава хутшăннисем фестиваль шухăшне чи уçса параканни, янăравли, ачасемпе çамрăксене медиауçлăхра хăйсене кăтартма чĕнекенни тесе йышăннă.

Конкурсра çĕнтернĕ май Светлана Чикмякова Пичет кунне халалланă уявра парнене тивĕçрĕ. Шăпах та çак праçникре ачасемпе çамрăксен «МедиаВзлет» фестивалĕ официаллă старт илчĕ.

Ирина ЯКОВЛЕВА.