Фермăри ĕç пĕр кун та чарăнса тăма пултараймасть, мĕншĕн тесен ĕне-выльăха вăхăтра тăрантармасан тата тутă тăратмасан продукци те нумай илеймĕн.

Кăçалхи тăватă уйăхри кăтартусене илсен, районта мĕнпур категориллĕ хуçалăхсенче сĕт производстви 12069 тоннăпа танлашнă, вăл шутра ял хуçалăх предприятийĕсенче – 4892 тонна. Ÿсĕм – пĕлтĕрхи çав вăхăтринчен 1,1 тата 4,9 процент. «Мураты», Карл Маркс ячĕллĕ хуçалăхсен, Вăрнарти аш-какай комбиначĕн тата Фадеев фермерăн ĕнесен продуктивлăхĕ тăватă уйăхра 2064 – 1903 килограма çитнĕ пулсан, «Юнтапа», «Знамя», «Победа» хуçалăхсен кăтартăвĕ 1020 килограмм кăна.

Январь–апрель уйăхĕсенче мĕнпур категориллĕ хуçалăхсенче аш-какай 1944 тонна туса илнĕ, вăл шутра ял хуçалăх предприятийĕсенче 1175 тонна. Кăтарту пĕлтĕрхи çав тапхăртинчен 103,1 процент тата 105,6 процент пысăкрах. Производство калăпăшĕ «Янгорчино», Карл Маркс ячĕллĕ, «Мураты», «Броневик», «Знамя» хуçалăхсенче тата Вăрнарти аш-какай комбинатĕнче ÿснĕ.

2018 çулхи май уйăхĕн 1-мĕшĕ тĕлне мĕнпур категориллĕ хуçалăхсенче мăйракаллă шултра выльăх 17441 пуç шутланать, вăл шутра 7840 пуç ĕне. Сыснасем районĕпе 13800 пуç. Тăватă уйăхра ял хуçалăх предприятийĕсенче выльăх йышĕ 435 пуç, ĕнесем 53 пуç ÿснĕ. Мăйракаллă шултра выльăхсен йышне Вăрнарти аш-какай комбиначĕ, «Мураты», «Броневик», «Победа», «Хорнзор», «Юнтапа» хуçалăхсенче ÿстерме пултарнă.

Чăваш ен патшалăх статистика управленийĕн кăтартăвĕсем тăрăх, Вăрнар районĕ сĕт, аш-какай туса илессипе тата ăна сутассипе, мăйракаллă шултра выльăхсен тата сыснасен хисепĕпе республикăра виççĕмĕш вырăнта.

Хальхи вăхăтра ĕнесене çуллахи лагере куçарни ферма çурчĕсене хĕллехи тапхăра тĕплĕн хатĕрлеме май парĕ.

Юрий КОРНИЛОВ.