Июнĕн 29–30-мĕшĕсенче Вăрнар районĕнче пысăк спорт мероприятине – Республикăри XIX ял спорт вăййисене ирттерме палăртнă. Çавна май виçĕмкун район администрацийĕнче ăна хатĕрленессипе йĕркелÿ комитечĕн ларăвĕ пулчĕ.

Ларăва Чăваш ен физкультурăпа спорт министрĕн пĕрремĕш заместителĕ Эльвира Матренина, тĕп специалисчĕ Андрей Никифоров, район администрацийĕн пуçлăхĕ Леонид Николаев ертсе пычĕç.

Ял спорт вăййисем пĕтĕмпе 16 тĕспе иртĕç. Çавăнпа та комитет вĕсен площадкисене палăртассине анлăн тишкерчĕ. Ăмăртусен пысăк пайĕ «Химик» стадионта пулĕ, çавăн пекех тĕссем тăрăх вĕсене Вăрнарти 1-мĕш, Хапăсри шкулсенче, ял хуçалăх техникумĕнче, культурăпа кану паркĕнче йĕркелеме палăртнă. Хăрушсăрлăхпа тивĕçтерес, апатлану, командăсене вырнаçтарас тата ытти йĕркелÿ саманчĕсене сÿтсе явнă хыççăн оргкомитет членĕсем площадкăсене вырăна тухса хакларĕç.

Светлана ЧИКМЯКОВА.