Этемлĕхĕн вăйлă çуррин уявĕ тĕлне Чăвашстат республикăра пурăнакан арçынсен статистика портретне хатĕрленĕ.

Иртнĕ çулхи январĕн 1-мĕшĕ тĕлне Чăваш енре 576 пин арçын пурăнни паллă. Вăл шутран 345 пинĕшĕ хуласенче, 231 пинĕшĕ – ялсенче. Ытларах пайĕ – ĕçлес ÿсĕмри çынсем – 63 проценчĕ, 16 çула çитичченхи ачасем – 21, ĕçлес ÿсĕмринчен аслăраххисем 16 процент.

Арçынсен вăтам ÿсĕмĕ 37 çул. Хуларисен – 35,2, ялтисен 39,9 çул. 90 çултан иртнисем 930 арçын.

2018 çулта ирттернĕ суйлавлă тишкерĕвĕн малтанхи даннăйĕсем тăрăх, арçынсен 66 проценчĕ (305 пин çын) экономикăра тăрăшать: 25 %-чĕ – строительствăра, 23 %-чĕ – тирпейлекен производствăра, 10 %-чĕ – суту-илÿре, автотранспорт хатĕрĕсемпе мотоциклсене юсанă çĕрте. Ĕçсĕррисем 5,2 процент. Культура, спорт, кану, финанспа страхлакан ĕç-хĕлре вĕсене сайрарах курма пулать.

Чăвашстат уяв тĕлне арçынсене мĕн ытларах парнеленине те тишкернĕ. Чи кĕçĕн хÿтĕлевçĕсене конструкторсемпе, çемçе теттесемпе савăнтараççĕ. Шкул ачисемпе студентсене парне вырăнне – ноутбук, смартфон, роликлă коньки, велосипед. Аслăрах арçынсене – электричество дрелĕ е триммер.

Светлана ЧИКМЯКОВА.