Çĕнĕ сезон пуçланчĕ, çапла майпа пире умра тĕрлĕ фестиваль-конкурссем татах кĕтеççĕ, терĕ «САЛАМ» ушкăн ертÿçи Алина Евдокимова.

Анчахрах вĕсем Кировран Пĕтĕм Раççейри купăсçăсен, халăх искусствипе творчествин «Вятские-хватские» фестиваль-конкурсĕн суйлавлă турĕнчен таврăннă. Унта «САЛАМ» ушкăн тулли мар йышĕпе – Алина Евдокимова, Светлана Мальцева, Галина Егорова, Анна Васильева – хутшăннă.

Çĕнĕ Вятка районĕн йышĕнче Вăрнар артисчĕсем «Росток» тата «Береза» юрăсене шăрантарнă. Сумлă жюри вĕсен номерĕсене ансамбльсем хушшинче чи лайăххи тесе палăртнă, I степеньлĕ дипломпа чысланă.

– Фестиваль-конкурс йĕркелÿçи, композитор, поэт-юрăç Игорь Русских ноябрьте Кировра фестивалĕн гала-концерчĕ иртессине пĕлтерчĕ. Унта хутшăнма лайăххисенчен чи лайăххисене суйласа илĕç. Çак списока пире те кĕртессе шанатпăр, – терĕ Алина Евдокимова.

Светлана ЧИКМЯКОВА.