Шăматкун районти вĕрентÿ пайĕ ашшĕ-амăшне кăсăклă мероприятие хутшăнма – патшалăхăн пĕрлехи экзаменне (ЕГЭ) тытма – май пачĕ.

Пĕтĕм Раççейри ку акцие Вăрнарти 1-мĕш шкулта йĕркелерĕç. Аслисен выпускниксен вырăнĕнче пулма тиврĕ: вĕсем ЕГЭ процедурине туллин тухрĕç. Кашнине телефон е шпаргалка илсе кĕресрен металлодетекторпа тĕрĕслерĕç, палăртнă пÿлĕмсене ăсатрĕç. Кашнин хăйне уйăрнă парта. Экзамен вăхăтĕнчи асăрхав та çирĕп пулчĕ.

Вырăс чĕлхипе харпăр хăй пĕлĕвне тĕрĕслес текенсем чылаййăн килнĕ. Вăл шутра – район администрацийĕн пуçлăхĕ Андрей Тихонов та.

Мероприяти «çавра сĕтелпе» вĕçленчĕ. Район администрацийĕн вĕрентÿ пайĕн пуçлăхĕн тивĕçĕсене пурнăçлакан Инна Егорова патшалăх экзаменĕ хумхануллă пулнине, анчах та нумай чухне ачасем мар, ашшĕ-амăшĕ ытларах пăшăрханнине палăртрĕ. Ку акци çак туйăма сирме пултарассине каларĕ: ачасене ăнлантармалла çеç.

Андрей Тихонов кирек мĕнле экзамен та студент синдромне çуратнине пĕлтерчĕ. «Паянхи тĕрĕслев ЕГЭ процедури хăрушă маррине, шкулта илнĕ пĕлÿ ун витĕр хумханмасăрах тухма май пуррине кăтартса пачĕ», – терĕ вăл.

Ашшĕ-амăшĕ те хăйсен шухăшне пĕлтерчĕç.

Светлана ЧИКМЯКОВА.