Йышăнакан çирĕп мерăсем лару-тăрăва тĕрĕслевре тытма май параççĕ пулин те, наркотиксен хăрушлăхĕ чакмасть. Кăçалхи çичĕ уйăхра полици сотрудникĕсем наркотиксен саккунсăр çаврăнăшĕпе çыхăннă 8 преступление тупса палăртнă.

Наркологи учетĕнче 31 çын шутра тăрать. Пурте вĕсем район территорийĕнче пурăнаççĕ. Çакнашкал кăтартусемпе паллаштарнă районти наркотике хирĕçле комиссин ларăвĕнче. Вăл район администрацийĕн пуçлăхĕ Андрей Тихонов ертсе пынипе иртнĕ.

«Вурнарский» пайăн полици пуçлăхĕн заместителĕ Андрей Сорокин уйрăммăн палăртнă тăрăх, усал пулăма хирĕç тăрассинче чи малтанах çула çитменнисемпе тимлесси тĕп вырăна тухать. Йĕрке хуралçисем ачасемпе çамрăксем çак наркăмăша иленесрен асăрхаттарассипе кулленех ĕçлеççĕ, ун сиенне ăнлантараççĕ. Полици пайĕнче тĕрлĕ сăлтавпа шута илнисем вара, хăрушлăх ушкăнĕнче пулнăран, пушшех тĕрĕслевре. Çавăн пекех çула çитменнисене наркотиксен саккунсăр çаврăнăшне явăçтарма хăтланакансемпе кĕрешесси те тĕп тĕллевсен шутĕнче.

Андрей Николаевич «Мăкăнь – 2021» профилактика операцийĕ вăхăтĕнче мăкăнь тата кантăр культурисене саккунсăр ÿстернĕ тĕслĕхсене палăртассипе тимленине те каланă. Шырава шалти ĕçсен пайĕн мĕнпур подразделенийĕсем хутшăнаççĕ. Асăрхавра – район территорийĕнчи сад-пахчасем, дачăсем, ял хуçалăх çĕрĕсем, пушă кил-хуçалăхсем.

Çула çитменнисемпе тимлекен комисси ку çивĕч ыйтупа мĕнле мерăсем йышăннине те сÿтсе явнă ларура. Калаçу ачасене наркотиксенчен хÿтĕлессине ирĕклĕ тата çамрăксен организацийĕсене хутшăнтарасси пирки пынă.

Полици сотрудникĕсем, вĕрентÿ учрежденийĕсен ертÿçисем наркотиксен «çулне пÿлес», районти лару-тăрăва çирĕплетес тĕлĕшпе хăйсен сĕнĕвĕсемпе паллаштарнă. Хăрушлăх ушкăнĕнчи ачасемпе çамрăксене спорт тата культура мероприятийĕсене, пултарулăх е ăслăлăх ăмăртăвĕсене ытларах явăçтармаллине каланă.

Ирина ЯКОВЛЕВА.