Раççей Шалти ĕçсен министерствин «Вурнарский» пайĕн информацийĕ тăрăх, иртнĕ эрнере преступленисем çинчен пĕлтернисене темиçе те регистрациленĕ, административлă йĕркене пăснă тĕслĕхсем те пулнă.

Январĕн 29-мĕшĕнче акă пĕр çамрăк тĕлĕшпе РФ Уголовлă кодексĕн 134-мĕш статйин 3-мĕш пайĕпе уголовлă ĕç пуçарнă. Ăна 13 çулти хĕрачапа ар çыхăнăвне кĕнĕшĕн айăплаççĕ. Çамрăк унччен те суд умĕнче пĕрре мар явап тытнă: ют пурлăха вăрланăшăн тата транспорт хатĕрне саккунсăр майпа хăваласа тарнăшăн.

Иртнĕ юнкун Вăрнарта çул çинче инкек çырăннă. Карл Маркс урамĕпе ВАЗ-21154 машинăпа пынă водитель 13-ри хĕрача çине кĕрсе кайнă. Телее, вăл йывăр аманман, ура туни суранланнă.

Февралĕн 1-мĕшĕнче 28-ти И. укçа вăрланипе полицие лекнĕ. Вăл поселокри пĕр лавккара 72-ри ватăнне 650 тенкĕ йăкăртнă.

Февралĕн 3-мĕшĕнче полици пайне 50-ри Ф. хăйĕн 15000 тенкĕ çухални çинчен пĕлтернĕ. Каярах палăртнă тăрăх, укçана амăшĕн ирĕкĕсĕрех ывăлĕ илнĕ-мĕн.

Çавăн пекех Уйкас Явăш ялĕнче пурăнакан тата Вăрнар çыннисем пĕлĕшĕсене, çывăх çыннисене хĕненисем çинчен пĕлтерÿсене регистрацилесе мерăсем йышăннă.

Ирина ЯКОВЛЕВА.