Ветеринари специалисчĕсем каланă тăрăх, çуркунне çĕр-шыва кайăксен грипĕ килес хăрушлăх ÿсет.

Вирусăн çĕнĕ штамĕ – Н5N8 – уйрăмах шухăшлаттарать. Раççейре çулталăк ытла (мартăн 26-мĕшĕ тĕлне) кайăк грипне палăртман. Юлашки хут вăл 2019 çулта Ростов облаçĕнче шар кăтартнă. Анчах халĕ усал мур Европăра сарăлнă май, пирĕн çĕршыв чикки патне те çывхарса пырать.

Асăннă мурпа чирленине Германире, Польшăра, Словакире шута илнĕ. Вирус Исландире, Сауд Аравийĕнче, Иорданире кайăк-кĕшĕк йышне палăрмаллах чакарнă. Нигери, Африка çĕршывĕсенче те чир вучахĕсем пулнă. Вирусăн тепĕр штамĕ – Н1N1 – Раççейре те хăрушлăх кăларса тăратма пултарать. Чире сарăлма пулăшакансем – тискер кайăксем.

2016–2018 çулсенче кайăк грипĕ пирĕн çĕршывра 6 млн ытла кайăка пĕтернĕ. Темиçе фабрика хупăннă. Вирус алхаснин тĕп сăлтавĕ – кайăк-кĕшĕк ĕрчетекен предприятисенче сывлăх, ветеринари-санитари йĕркисене пăхăнманни. Шел, республикăри хуçалăхсенче кун пирки манаççĕ. Вĕсенче дезчăрмавсем, санпропусксем йĕркеллĕ ĕçлемеççĕ, выльăха апат памалли вырăна тискер кайăксем çăмăллăнах вĕçсе кĕреççĕ. Йĕркесĕрлĕх выльăх фермисенче те пайтах. Ветеринари докуменчĕсĕрех продукцие сутаççĕ.

Раççей ял хуçалăх надзорĕн Чăваш енри тата Ульяновск облаçĕнчи управленийĕ йĕркене пăхăнманшăн Шупашкар, Канаш, Йĕпреç, Елчĕк, Муркаш, Вăрмар, Патăрьел районĕсенчи хуçалăхсене административлă явап тыттарнă.  

Н.ВАСИЛЬЕВА.