Коронавирус чирĕ сарăлнине пула шкул ачисем çуркуннехи каникул хыççăн яланхилле парттăсем хушшине лараймарĕç.

Вĕренÿ дистанцилле мел çине куçрĕ. Ача сачĕсен воспитанникĕсем те, дежурнăй ушкăнсене çÿрекенсемсĕр пуçне, вăхăта килте ирттереççĕ. Çак лару-тăрура вĕсен хăрушсăрлăхне тивĕçтересси пирки манмалла мар. Паллах, ку тивĕç халĕ ашшĕ-амăшĕ çине ытларах тиенет.

Раççей МЧС-ĕ те кăткăс тапхăрта профилактика ĕçне вăйлатнă. Управляющи компанисемпе пĕрле вĕсем пушар хăрушсăрлăх правилисемпе çыхăннă памяткăсене уйрăм хуçалăхсене çитереççĕ, нумай хваттерлĕ çуртсенче сараççĕ.Тĕпрен илсен, вĕсенче килти газ тата электрооборудовани юсавлă пулмаллине, вĕсемпе хăрушсăр, хăвăрт хыпса илме пултаракан япаласенчен аякра усă курмаллине, шăрпăка пĕчĕккисем çитеймен вырăнта тытмаллине ăнлантараççĕ.

«Ачасем, уйрăмах кĕçĕннисем, кунĕпе килте чухне вĕсене хăйсене хăрушсăр тытма вĕрентесси мала тухать. Вĕсем çулăмпа ашкăннине пула пушарсем тухасран сыхланасси – аслисен тивĕçĕ. Çулталăк пуçланнăранпа кăна çĕршывра пушарсенче 76 ачан пурнăçĕ татăлнă. Çавăнпа та дистанцилле вĕренÿ вăхăтĕнче те ачасем хăйсем тĕллĕн пулмалла мар, ашшĕ-амăшĕ енчен çирĕп тĕрĕслев кирлĕ. Вĕсене йăлари приборсемпе тата компьютер техникипе асăрхануллă усă курмалли çинчен калаçăр, вут-çулăм сиенне ăнлантарăр»,– асăрхаттарать Раççей МЧС-ĕ.

Ирина ЯКОВЛЕВА.