Федераци кадастр палатипе Росреестр пĕрле «Уçă кадастр картти» çĕнетнĕ онлайн-сервиса хута янă.

Интерактивлă картта пулăшнипе çынсем Патшалăхăн куçман пурлăхăн пĕрлехи реестрĕнчи (ЕГРН) сведенисемпе ирĕклĕнех паллашма пултараççĕ. Сервиспа усă курма меллĕ пултăр тесе интерфейс йĕркеленĕ.

Çĕнелнĕ сервисра кадастр карттипе мĕнле усă курмаллине тĕплĕн вĕрентнĕ. Унсăр пуçне менюра карттăпа ĕçлеме ытти майсене те кăтартнă. Сăмахран, истори, культура палăкĕсен, социаллă пурнăçпа экономика тĕлĕшпе лайăх аталаннă территорисем, вăрманпа вăрманлăх, сунар хуçалăхĕ, шыв объекчĕ, уйрăмах сыхлакан çутçанталăк вырăнĕсем пирки тата ытти те.  

Сервисра патшалăх çĕр мониторингĕн кăтартăвĕпе те паллашма пулать. Куçман пурлăх объекчĕн информаци карттине хăçан палăртни, кĕртни, кадастр хакне çирĕплетни... – йăлтах пур.

Çĕнелнĕ сервиспа усă куракан хăйне кирлĕ сведенисене тупаймасан куçман пурлăхăн объектне кадастр округĕнче, районĕнче, кварталĕнче шырама пултарать.

Онлайн-сервис интерактивлă йĕркепе ЕГРНри объектсемпе паллашма кăна мар, куçман пурлăхсен чиккине, хушшине палăртма пулать тата ытти те.

«Уçă кадастр картти» сервисра куçман пурлăхăн кадастр хакне, номерне, харпăрлăх формине, усă курма ирĕк панине, тĕллевне, лаптăкне те кăтартнă. Кадастр карттинче патшалăх чикки, РФ субъекчĕсем, муниципалитетсем, ялсем, çĕр лаптăкĕсем, куçман пурлăхăн тĕрлĕ объекчĕсем (çурт-йĕр, сооруженисем, туса пĕтереймен строительство объекчĕ...) те пур.

Хальхи вăхăтра сервисра 60 млн çĕр участокĕ, çавăн пекех 44 млн çурт, сооружени, вĕçлеймен строительство объекчĕсем. 2019 çулта кадастр карттипе 8 млн çын усă курнă. Кăçал çулталăк пуçланнăранпа – 2 млн çын.

«Уçă кадастр картти» сервисри сведенисем куллен çĕнелеççĕ. Унпа пурте усă курма пултараççĕ. Куçман пурлăх пирки тĕрĕс те тулли информаци илме май пурри ĕçе палăрмаллах çăмăллатать. Сервиспа усă курас тесен регистрацие тăмалла мар.