Кĕрхи культурăсем 6536 гектар йышăнаççĕ. Çав лаптăка минерал удобренийĕсемпе апатлантарас ĕç пуçланнă.

Чи малтан «Санары» агрофирмăра, «Мураты» кооперативра техникăна уй-хире кăларнă. «Санары» хуçалăхра «Московская-56» тулла апатлантарма тытăннă. Минерал удобренийĕсем çителĕклĕ. Ĕçе хăй тĕллĕн çÿрекен «Туман» опрыскивательпе пурнăçлаççĕ. Çавăн пекех туллăн «Немчиновская-17», урпан «Татьяна», «Çулăм» сорчĕсене те апатлантармалла.

Çураки – яваплă тапхăр. Патшалăх техника асăрхавĕн районти патшалăх аслă инспекторĕн тивĕçĕсене пурнăçлакан Алексей Терентьев «Санары», «Мураты», Карл Маркс ячĕллĕ кооперативсенче пулнă. Ял хуçалăх машинисен юсавлăхне тĕрĕсленĕ. Пур техника уй-хире тухма хатĕррине палăртнă. Алексей Терентьев кооперативсенче тăрăшакансемпе хăрушсăрлăх техникине тата правилисене пăхăнас тĕлĕшпе инструктаж ирттернĕ. Пур механизатора ятарлă тумтирпе тивĕçтернĕ. Графикпа килĕшÿллĕн тĕрĕслев ытти хуçалăхра та иртĕ.