Эрнекунпа шăматкун Вăрнар чăн-чăн кĕрешÿ вырăнĕ пулса тăчĕ – кунта бокс енĕпе район администрацийĕн пуçлăхĕн парнисемшĕн уçă турнир иртрĕ.

Вăрнар районĕнче спортăн ку тĕсĕ вăйлă аталаннă тееймĕн, анчах та Геннадий Егоров тренер тивлечĕпе уйрăм спортсменсем ун вăрттăнлăхĕсене алла илеççĕ. Çакăншăн вăл турнир вăхăтĕнче Тав çырăвĕпе Кубока та тивĕçрĕ.

Çитĕнекен ăру сывă пурнăç йĕркине тытса пыни çитĕнÿсем патне çул хывниех пулнине район администрацийĕн пуçлăхĕ Андрей Тихонов турнира уçнă вăхăтра яр уççăн палăртрĕ. «Спортпа туслă çын ÿт-пĕвĕпе те, ăс-хакăлĕпе те çирĕп. Бокс уйрăмах арçынсене илĕртет», – терĕ вăл.  

Вăрнар район прокурорне Евгений Краснова вара бокс тĕсĕ питĕ çывăх. Вăл – республикăри паллă боксер ывăлĕ. Çамрăксене вăл кĕрешÿ мелĕсемпе профессионаллă спортра кăна усă курма сĕнчĕ.

«Август» Фирмăн «Вăрнарти хутăш препаратсен завочĕ» филиалĕн директорĕ Владимир Свешников районта футбол, ирĕклĕ кĕрешÿ ытларах вăй илнине палăртрĕ, ку турнир хыççăн çамрăксем хушшинче бокса кăмăллакансем ÿсессине те шанса каларĕ.

Района эрнекун бокс «çăлтăрĕсем» нумаййăн килсе çитнĕ% тренерсем, сумлă турнирсен чемпионĕсем – Валерий Краснов, Валерий Лаптев, Игорь Иванов, Валерий Львов. Вĕсем те çамрăксене çитĕнÿсем патне ăнтăлма сунчĕç.

– Турнира çамрăк чухне бокс ăсталăхне пĕрле туптанă юлташа Виталий Николаева курмалла тесех килтĕм. Вăл судьясен коллегийĕнче тăрать. Сĕнтĕрвăрринчи вăрман техникумĕнче вĕреннĕ вăхăтра республикăри ăмăртусене хаваспах хутшăннă. Хам виçере пĕрре кĕмĕл призер, унтан Чăваш ен, хыççăн Атăлçи округĕн чемпионĕсем пулса тăтăм. Юлташăм ку енĕпе пурнăçне малалла та çыхăнтарчĕ, ман çул урăх еннелле выртрĕ. Район çамрăкĕсем спортпа туслашнишĕн савăнатăп, – терĕ Вăрнарта пурăнакан Иван Григорьев.

Ринга Вăрнар, Йĕпреç, Красноармейски, Çĕрпÿ, Вăрмар, Етĕрне, Çĕмĕрле, Муркаш районĕсенчи, Шупашкар, Канаш, Çĕнĕ Шупашкар хулисенчи, çавăн пекех Молдова Республикинчи çамрăксем тухрĕç.

Хамăр район чысне Максим Мордов, Максим Алексеев, Дмитрий Петров, Дмитрий Михайлов, Виссарион Петров, Александр Медведев, Максим Архипов, Антон Алексеев тата Андрей Иванов хÿтĕлерĕç.

Профессионаллă тытăçăва иккĕн кĕчĕç. Тăватă раундлă кĕрешÿре Вăрнар каччи Дмитрий Прокопьев çĕнтерÿçĕ пулса тăчĕ, Шупашкар каччине парăнтарчĕ. Ун юлташĕ Евгений Смирнов та Шупашкар çамрăкĕпе çапăçрĕ, анчах хăна унран вăйлăрах пулчĕ, пирĕн ентеше «кĕмĕл» тивĕçрĕ.

Турнира Сăр тата Хусан хÿтĕлев чиккисен строителĕсен паттăрлăхĕн çулталăкне халалларĕç. Çĕнтерÿçĕсем чыса тивĕçрĕç.

Светлана ЧИКМЯКОВА.