Правительство çуртĕнче коронавирус инфекцийĕ сарăлассине чарас енĕпе ĕçлекен ятарлă штабăн черетлĕ ларăвĕ иртнĕ. ЧР Пуçлăхĕ Олег Николаев ют çĕршывсенче чир тепĕр хут вăй илме пуçланине, пирĕн регионта та лару-тăру хăть те хăш самантра та улшăнма пултарнине, çавна май чикĕ леш енчен таврăнакансене сăнаса тăмаллине палăртнă.

Кăçал 7060 çын (342-шĕ — ачасем) коронавируспа чирленĕ, вĕсенчен 6539-шĕ сывалнă. Хальхи вăхăтра стационарта 786 çын сипленет, вĕсенчен 20-шĕ ИВЛ аппаратпа сывлать. Килте 2358 çын медпулăшу илет. Вĕсене эмелпе тивĕçтереççĕ. Коронавируслисем валли 10 больницăра 1050 койка пур. Вĕсен шутне майĕпен кĕскетсе пыраççĕ. Хальхи вăхăтра 193 çын санаторисенче сипленет. Коронавирус инфекцийĕнчен хÿтĕлекен прививкăна 58060 çын тутарнă.

Икĕ эрнере мобильлĕ ушкăнсем 4602 хут тĕрĕслеве тухнă, 36 çитменлĕх тупса палăртнă. 122 номерпе çынсем пин ытла хут шăнкăравланă. Вĕсем вакцинаци, эмелпе епле тивĕçтерни тата тест ăçта туни çинчен ыйтса пĕлнĕ.