Шаннă çĕнтерÿ. Çакăн пек калас килет Аçăмçырминчи вĕренекенсен черетлĕ çитĕнĕвĕ пирки. Шкулти çамрăк çул-йĕр инспекторĕсем «Хăрушсăр урапа» республикăри фестиваль-конкурсра кăçал та пĕрремĕшсем!

Саламлатпăр хастар та мал ĕмĕтлĕ ачасене тата хăйĕн ĕçне чунтан парăннă В.Петров вĕрентекене. Чылай çул ĕнтĕ чи лайăххисен ятне вĕçертмеççĕ маттурсем.

Вĕсем сумлă кăтартусемпе савăнтарнине хăнăхрăмăр пулин те, аван ăнланатпăр: çĕнтерÿ пачах та çăмăллăн туптанмасть. Ун хыçĕнче – кунсеренхи, уроксем хыççăнхи тренировкăсем, çул-йĕр правилисене тăрăшса шĕкĕлчени, пултарулăх номерĕсене хатĕрленни. Çапах та шкулта çул-йĕр хăрушсăрлăхне вĕрентес енĕпе тĕллевлĕ ĕçленине, В.Петров вĕрентекен ачасене ЮИД юхăмĕпе кăсăклантарассишĕн чунтан çуннине пĕлнĕрен ĕнтĕ аçăмçырмисенчен çĕнтерÿ кăна кĕтетпĕр.

Хальхинче те конкурсăн пур ăмăртăвĕнче тенĕ пекех çаврăнăçулăхĕпе тата ăсталăхĕпе нихăш команда та çитеймен вĕсене. Çул-йĕр правилисене пĕлессипе, велосипедпа фигурăсем туса ярăнассипе, «Автохула» конкурсра, пултарулăх номерне кăтартассипе – пĕрремĕшсем. Малтанхи пулăшу парассипе вара иккĕмĕш вырăн йышăннă. Çапла, уйрăм конкурссенчи пысăк балсене кура, пĕтĕмĕшле команда çĕнтерĕвĕ те вĕсен аллинче. Тупăшу вара чăннипех те çивĕч пынă. Аçăмçырмисем Чăваш енри мĕнпур хула-районтан килнĕ 24 командăна кая хăварнă.

Апла пулин те канма вăхăт çук-ха – вĕренекенсем татах та ытларах хавхаланупа тренировкăсенче пиçĕхеççĕ. Республикăра мала тухнă май, Аçăмçырминчи çамрăк çул-йĕр инспекторĕсем «Хăрушсăр урапа» Раççей конкурсĕнче ăмăртас тивĕçе çĕнсе илнĕ. Тĕп финалта та ăнăçу сунатпăр вĕсене.

Ирина ЯКОВЛЕВА.