Раççей Федерацийĕн Правительствин халăх çыравне ирттерес енĕпе ĕçлекен комиссийĕн ларăвĕ пулнă. Регионсем ăна мĕнле хатĕрленсе çитнĕ, волонтерсемпе студентсем унта хутшăнĕç-и, Патшалăх тивĕçтерĕвĕсен пĕрлехи порталĕ çырав хучĕсене онлайн мелпе хуравласа тултарас текенсене пурне те йышăнма пултарĕ-и? Çак тата ытти нумай ыйтăва сÿтсе явнă.

«Çырав пĕтĕм çĕршывĕпе иртекен кăçалхи тĕп проект шутланать. Правительствăн стратегиллĕ пĕлтерĕшлĕ чылай йышăнăвĕ Раççей статистики пуçтарнă даннăйсенчен нумай килет. Регионсен çырава пĕтĕмпех хатĕрленсе çитмелле, çыравçăсене çителĕклĕ ĕçе илмелле, Патшалăх тивĕçтерĕвĕсен пĕрлехи порталĕпе пĕр чăрмавсăр усă курма май тумалла», – тенĕ Раççей Федерацийĕн Правительствин председателĕн пĕрремĕш çумĕ Андрей Белоусов.

Раççей статистикин ертÿçи Павел Малков регионсене ятарлă программăсемпе тата кирлĕ оборудованипе пĕтĕмпех тивĕçтернине пĕлтернĕ. Çыравçăсем валли 360 пин планшетлă компьютер туса кăларнă. Пĕтĕм Раççейри халăх çыравĕн автоматизациленĕ тытăмĕ пысăк калăпăшлă информацие хÿтĕлевлĕ каналсемпе йышăнма хатĕр.

Павел Малков Раççей çамрăкĕсемпе пĕрле «Çырав волонтерĕсем» программа пурнăçланни пирки каланă. Çитес çыравăн уйрăмлăхĕ – цифра волонтерĕсене (пĕтĕмпе 25 пин çын енне) хутшăнтарни. Вĕсен халăха интернет урлă харпăр хăй тĕллĕн çырăнма пулăшмалла.

Цифра аталанăвĕн, çыхăну тата массăллă коммуникаци хатĕрĕсен министрĕн çумĕ Олег Качанов пĕлтернĕ тăрăх, июль вĕçĕ тĕлне Патшалăх тивĕçтерĕвĕсен пĕрлехи порталĕ онлайн-çырав ирттерме технологи тĕлĕшĕнчен пĕтĕмпех хатĕр пулать.

Пĕтĕм Раççейри халăх çыравĕн медиаофисĕ.