Кивçурт-енĕшсем ял уявне кăçал Тинĕс-Çар флочĕн кунĕпе çыхăнтарчĕç.

Совет Союзĕн Геройĕ Степан Илларионович Илларионов ячĕллĕ сквера илемлетнĕ. Вырăнти «Пилеш» ушкăнĕн артисчĕсем – Светлана Алексеева, Татьяна Афанасьева, Юлия Александрова, Альбина Васильева, Валентина Афанасьева, Андрей Афанасьев тата Владимир Арсентьев купăсçă – пухăннисене юрăсемпе, илемлĕ ташăсемпе тыткăнларĕç. Ачасен ушкăнĕ те яланхиллех хастар пулчĕ – моряксен ташшипе савăнтарчĕ.

Уява хăнасем те килсе çитнĕ. Канаш районĕнчи Ямашри халăх пултарулăх коллективĕн номерне те кивçурт-енĕшсем хаваспа йышăнчĕç.

Санитарипе эпидемиологи лару-тăрăвне кура ял уявне ытти çулти пек анлăн паллă тумарĕç, апла пулин те вăл пурин кăмăлне те çĕклерĕ. Ял хастарĕ, вырăнти музей директорĕ Вячеслав Алексеев ентешсене пур ĕçре те пĕрле пулма чĕнсе каларĕ. Каçхи тÿпене салют çĕкленчĕ.

Светлана ЧИКМЯКОВА.