Ĕçпе канăва черетлени питех те кирлĕ. Клуба тухса кăмăла çĕклеме, тавракурăма аталантарма пулать. Ял-йышпа пĕрле концертсем, спектакльсем пăхни, тĕрлĕ конкурссене, литература каçĕсене, уявсене хутшăнни епле аван! Тÿрех пурнăçа хаваслăх кĕнине асăрхатăн. Тепĕр тесен, клуб ĕлĕкрен чуна кантармалли вырăн шутланнă. Паянхи кун та хăйĕн тÿрĕ тивĕçне пурнăçлать.

Паллах, культура учрежденийĕсен хăтлăлăхпа та куракансене илĕртмелле. Акă, Вăрманкас ял тăрăхĕнчи клубсенче юсав ĕçĕсем ирттерес тĕлĕшпе сахал мар тăрăшаççĕ. Çĕнĕ сăн-сăпат кĕнĕрен вĕсене чăннипех культура вучахĕ тесе çирĕплетме пулать. Илемлĕ çуртсем пур ÿсĕмри çынна та хапăл туса йышăнаççĕ.

Иртнĕ çул Мăньял Хапăсри клубăн пĕрремĕш хутĕнчи чÿречисене пластиклипе улăштарнă, 3 алăка çĕнетнĕ. Пĕтĕмпе юсав ĕçĕсене 483 пин тенкĕлĕх пурнăçланă. Çурта 1976 çулта çĕкленĕ. Пурнан пурнăçра темĕнле лару-тăру та сиксе тухать. Пĕлтĕр кĕркунне çил-тăвăл алхаснăран клуб тăрринчи темиçе шифер вистеннĕ.

– Район пуçлăхне, «Звездопад» строительство обществин гендиректорне Владимир Яковлева тавах. Вăл спонсорла пулăшу кÿчĕ. Унсăрăн подрядчикпа килĕшÿ тума вăхăт самаях кирлĕччĕ, – терĕ Иван Афанасьев.

Мăньял Хапăс клубĕнче туса ирттермелли ĕçсем планра тата пур% газ кăмакине ылмаштармалла, иккĕмĕш хутри чÿречесене çĕнетмелле.

Вăрманкас клубĕ те тимлĕхрех. Çĕнĕрен лартнă алăк яриех уçăлать, кашни çыннах кăмăлпа кĕтнине асилтерсех тăрать. Тепĕр икĕ çултан кунта та учрежденин сăн-сăпатне илемлетессипе малалла ĕçлĕç. Иван Васильевич палăртнă тăрăх, район ертÿлĕхĕ тăрăшнипе культура сферинчи программăсем пурнăçа кĕрсех пыраççĕ.

Клуба ял чĕрипе танлаштараççĕ. Культура вучахне упрассипе тимлекенсем халăха кăсăклантарма тĕрлĕрен тĕрлĕ мероприятисем йĕркелеççĕ.

– Нина Тикинева заведующи тата пултарулăх ертÿçи Надежда Леонтьева вăй хунăран пушă вăхăта усăллă тата интереслĕ ирттерме пулать, – пĕлтерме васкарĕ Вăрманкасра пурăнакан хĕрарăм.

Клуб ĕçченĕсем тĕрлĕ шайри конкурссене хутшăнаççĕ. «Илемпи» ансамбль, акă, регионсем хушшинче иртнĕ «Нумай тĕслĕ çĕршыв –2021» фестиваль лауреачĕ.

Культура çуртĕнчи мероприятисене хастар хутшăнакансене палăртмалла. Вĕсем – Мăньял Хапăсри Людмила Волкова, Галинăпа Валериян Тикиневсем, Вăрманкасри Людмила Козлова, Эльвира Чугунова, Арина Поспелова, Катăшри Валентина Егорова, Нина Тимофеева.

Клубра тимлекенсем кинофильмсем ÿкерессипе те тăрăшаççĕ. Ачасемпе çамрăксене те, çитĕннисене те творчество ĕçне явăçтараççĕ. Николай Николаев, Антонина Кузьмина, Анастасия Герасимова тата ыттисем ăсталăха темиçе çул туптаççĕ. Клуб çумĕнче «Хĕлхем» халăх театрĕпе хореографи кружокĕсем ĕçлеççĕ. Пултарулăх коллективĕсем районта та, республикăра та палăрма ĕлкĕрнĕ. СССР халăх артисчĕ Н.Д.Мордвинов ячĕпе хисепленекен театр фестивалĕнче III степеньлĕ диплома тивĕçнĕ.

Вăрманкас ял тăрăхĕн пуçлăхĕ Иван Афанасьев та 2003–2007 çулсенче клуб директорĕнче тăрăшнă. Культура учрежденине хăтлăх кĕртессипе, концерт программисене пуянлатассипе ырми-канми тимленĕ. Вăл паянхи кун клубсенче тăрăшакансен ĕçĕпе питĕ кăмăллă.

Елена ПОРФИРЬЕВА.