Ĕнер Космонавтика кунне паллă турăмăр. Çак дата тĕлне Хапăсри шкулта çарпа патриотизм мероприятийĕ иртрĕ

Юрий Гагарин пире хамăр çĕршывпа мухтанма, тĕнче уçлăхне пĕрремĕш уçакан тесе калаттарма май пачĕ. Паллах, Раççей космос отраслĕнче паян та малтисен йышĕнче пырать. Ун пуласлăхĕ вара чи малтанах çитĕнекен ăруран килет.

Ачасем инженерсен, конструкторсен, тен, космонавтсен йышне те кĕччĕр тесен вĕсене шкул çулĕсенче патриотизм юхăмне явăçтарни питех те пĕлтерĕшлĕ. Кунашкал мероприятисене хутшăнни çамрăк ăрăва пĕр-пĕриншĕн, пĕрлехи ушкăншăн яваплăха туйма хăнăхтарать, çар-вĕренÿ мелĕсене вĕрентет.

Шăпах çак тĕллеве пурнăçларĕ те ĕнтĕ шăматкун Хапăсри шкулта иртнĕ слет. Ăна çын космоса çĕкленнĕренпе 61 çул çитнине халалларĕç.

Парада Хапăсри, Вăрнарти 2-мĕш, Туçи Мăратри, Кĕçĕн Кипекри тата Мăн Явăшри шкулсен патриот командисем тăчĕç. Çак кун вĕсен камран тĕслĕх илмелли пулчĕ. Парада хамăрăн ентеш, Катăш çынни Геннадий Нарышкин подполковник ертсе-йĕркелесе пычĕ. Ачасене çавăн пекех пакунлă-çăлтăрлă ытти сумлă хăна та хавхалантарчĕ% ГСВГ, пограничниксен пĕрлешĕвĕн, казачество юхăмĕн представителĕсем Анатолий Васильев, Владимир Эндрухин, Виктор Романов, Юрий Медяков, Юрий Никифоров, Иван Яковлев, Николай Николаев, полицин «Вурнарский» пайĕн пуçлăхĕн помощникĕ Лилия Забирова тата ыттисем. Вĕсем командăсене кирек мĕнле пулсан та Тăван çĕршыва юратма, уншăн тăрăшма чĕнсе каларĕç.

Ачасем сакăр тĕслĕ тĕрĕслев витĕр тухрĕç% командирсен доклачĕ тата стройри пек утасси, парадпа ялавсăр утасси, ялава торжествăлла майпа йăтса тухасси, ялав йăтса стройпа утасси, юрласа утасси, инсценировкăллă юрă, суранланнă çынна пĕрремĕш пулăшу парасси, Калашников автоматне сÿтсе пуçтарасси.

Кашни команда хăш конкурсра вăйлăрах пулни аван сисĕнчĕ. Хăшпĕр тĕсне кăна илер. Мăн Явăш шкулĕн хĕрачисем акă автомата туххăмра сÿтсе пуçтараççĕ. Ахальтен мар ĕнтĕ вĕсем ку енĕпе чи маттуррисем пулчĕç. Туçи-мăратсем стройпа ура-уран чаплăн утаççĕ...

Инсценировкăллă номерсем тыткăнларĕç. «Тĕнче вăрçăсăр», «Эпир мирлĕ пурнăçшăн!» – çакнашкал шухăша кашниех палăртрĕ. Украинăри спецопераци салтакĕсемшĕн чунĕсем çуннине те кăтартрĕç ачасем.

Кусем çĕршывăн çирĕп никĕсĕ пулассине шанма пулать. Анчах та çулсем иртнĕçемĕн вĕсен ĕмĕт-тĕллевĕсем, вĕренес, çĕннине пĕлес, ĕçлес туртăмĕ, чи кирли – патриотизм туйăмĕ ан сÿнтĕр кăна...

Паллах, çакна та каламасăр иртес килмест. Пирĕн патра кăна мар, нумай çĕрте патриотла командăсен ертÿçисем – хĕрачасем. Хальхи вăхăтра, патриотизма уйрăмах пĕрремĕш вырăна кăларнă тапхăрта, командирсен, автомат-ялав йăтакансен ретне çав-çавах арçын ачасене ытларах тăратас килет...

Кăçалхи слетăн çĕнтерÿçи Туçи Мăратри шкул команди пулчĕ. Хапăссем – 2-мĕш, мăн-явăшсем 3-мĕш пулчĕç. Анчах та кашни ушкăнах вăл е ку конкурсра çĕнтерÿçĕ Дипломне илме пултарчĕ.

«Районти «Çĕнтерÿ çулĕ» хаçат редакцийĕ» автономлă учреждени ятĕнчен те парнеллĕ пулчĕç ачасем. Мăн Явăш шкулĕ редакцирен торта, Туçи Мăрат шкулĕн ачисем патриотла юрă юрласа çĕнтернĕшĕн грамотăсене тивĕçрĕç.

Светлана ЧИКМЯКОВА.