Вăрнарти ял хуçалăх техникумĕн вĕренекенĕсем хушшинче спортăн чăн-чăн тусĕсем нумай. Галина Павловапа Владимир Максимов тренерсем хатĕрленипе вĕсем çитĕнÿ хыççăн çитĕнÿ туни пирки пĕлтерме питĕ кăмăллă.

Нумаях пулмасть, акă, вĕсем Шупашкарти пысăк ăмăртуран лайăх кăтартусемпе таврăннă. Кунта пушар-çăлав спорчĕ енĕпе Чăваш ен Пуçлăхĕн Кубокĕшĕн республика ăмăртăвĕсем иртнĕ.

Спортăн ку тĕсĕ, тĕрĕссипе, хăйне евĕрлĕ. Ун тĕллевĕ чи малтанах – инкексенчи çăлав хăнăхăвĕсен пахалăхне тата хăвăртлăхне ÿстересси. Ăмăртусенче вара çак çăмăл мар службăра тимлекенсем хăйсене тĕрĕслеççĕ.

Апла пулин те спортăн кăткăс тĕсĕнче Вăрнар студенчĕсем те палăрма пултарнă. 2-мĕш курсра вĕренекен Владимир Шашкин, акă, 100 метрлă, чăрмавсемлĕ дистанцие малтисен йышĕнче тухнă. Пĕрремĕш вырăна кăшт кăна выляса янă, иккĕмĕш пулнă.

Канашра урамри баскетбол енĕпе иртнĕ вăйăсенче те техникум студенчĕсен результачĕсем аван. Уйрăмах – хĕрсен командин. Хăйсен ушкăнĕнче вĕсем кашни вăйăрах çĕнтерÿшĕн çивĕч кĕрешнĕ. Пĕтĕмĕшле Вăрнар хĕрĕсен – иккĕмĕш вырăн. Ăста вылякан команда йышĕнче – Валерия Воробьева, Анастасия Александрова, Мария Путряшова тата Светлана Трофимова.

Каччăсен ушкăнĕ вара тупăшура тăваттăмĕш вырăн йышăннă. Ăмăртусем Чăваш енри професси вĕрентĕвĕн организацийĕсен спартакиадин зачетне кĕреççĕ.

Ирина ЯКОВЛЕВА.