Вăрнарти аш-какай комбиначĕн комбайнĕсем «уй-хир пикин» юлаш-ки гектарĕсем çинче мăнаçлăн ишеççĕ.

Кăçал агрохолдингăн хушма хуçалăхĕнче ку культурăна 1300 гектар çинче лартса ÿстернĕ. Вăл шутра 800 гектарне – тĕшĕлĕх.

Халĕ хăватлă техника Пăваяль çумĕнчи лаптăкра тимлет. Штурвалсем умĕнче опытлă механизаторсем: Николай Тихонов, Валерий Иванов тата Сергей Авакумов. Çапнă кукурузăна тÿрех сушилкăна турттарса тăраççĕ, хыççăн ятарлă ангарсене хураççĕ.

Вăрнарти аш-какай комбиначĕ пур енлĕ хаклă культурăна ÿстерессипе кăтартуллă тимлет. Сортсене хамăр тăрăхри çанталăк условисене кура çĕнетсе пырать.

Кукуруза выльăхшăн питĕ пахалăхлă апат шутланать. Ăна рациона кĕртни сĕт-çу, аш-какай туса илессин кăтартăвĕсем çине те ырă витĕм кÿрет. Уйрăмах самăртакан выльăхшăн лайăх.

Светлана ЧИКМЯКОВА.