Пирĕн иммунитет - организма вируссемпе бактерисенчен хÿтĕлекен тĕп механизм. Иммун системи эволюци майĕпе аталанни ĕнтĕ шăпах та çын пурăнма пултарнине палăртнă та.

Иммун тытăмĕ этемĕн сывлăхĕпе пурнăçĕшĕн çав тери пысăк вырăн йышăнать. Вăл - организма аякран лекекен е организмрах «çуралакан» ют веществосенчен хÿтĕлес тĕллевлĕ органсемпе клеткăсен комплексĕ. Ку система хавшани тата ун ĕçĕ пăсăлни вара çынна чир-чĕрсем умĕнче айванрах тăвать, пĕр-пĕр чирĕн рецидивĕсем ÿсни е йывăртарах иртни патне илсе çитерме пултарать. Иммун тытăмĕ тĕрĕс ĕçлетĕр тесен ăна пĕрмаях «хатĕрлĕхре» тытмалла. Апла-тăк, пурнăç сывă та лăпкă пултăр тесен, çак тĕп сĕнÿсене пăхăнсан аван:

Тĕрĕс апатлану - ку тĕп правилăсенчен пĕри. Рационра усăллă, сиенсĕр апат-çимĕç пулмалла - организмăн унран витаминсемпе ытти кирлĕ веществосене çителĕклĕ илмелле.

Тепĕр шанчăклă мел - вакцинаци. Тĕрлĕ чир-чĕртен сыхланни иммунита çирĕплетессишĕн питĕ пĕлтерĕшлĕ.

Пăхăнмалли тепĕр сĕнÿ - сывă пурнăç йĕркине тытса пырасси. Тĕрлĕ упражненисем - чупу, ишев, гимнастика, тренажерсем çинче хускални, уçăлса çÿрени, ыттисем - пĕтĕмпех иммун системине ырă витĕм кÿреççĕ.

Иммунитета сиенлекен тĕп сăлтавсен шутĕнче - стресс. Пĕрмаях пусăрăнчăк, пăлхавлă кăмăлпа çÿрени организма вăйлă сиен кÿме пултарать. Çавăнпа та стреслă лару-тăрусенчен хăтăлма е вĕсем вăхăтĕнче лăпкăрах пулма тăрăшăр.

Асра тытмалла: иммунитета çирĕплетесси те тĕрĕслевсĕр иртмелле мар - ăна кашни организм уйрăмлăхĕсене шута илсе ÿстермелле тата кирлĕ шайра тытса тăмалла.

Нина ФЕДОРОВА,

пĕтĕмĕшле практика врачĕ